Esparbel Rondador

Blog d'un esparbel que fa unas añadas s'en fue t'al norte, an pleba de la nieu de peren y no conoxioron mai l'imperio romano, dimpues s'en fue t'al sur, an os alpes y ro mediterraneo se i troban, prou luego estie en a isla d'a libra y o burger King, ascape torne a cambear de nido, y pare por as tierras d'a txalaparta lo txistu y o fromache d'idiazabal. pero o suyo prexinallo ha estau de peren en as bals aragonesas y como fer ta tornar-ie.

7.2.13

Torno t'o rete

Ya feba un camaton de diyas que no m'amanaba por asti.
Cal dizir que deixe de escribir en o blog cuan l'esparbel torno ta ra suya bal. Ya no teneba garra necesida de escribir en aragones, pues  yera una mena de sentirme en casa, y cuan torne ta ra mia bal, disaparixé.

Pero me faria goyo tornar a implir a blogosfera con palabras aragonesas, que "guena falta fa!",

9.11.10

As comarcas


Belun sape ta que sirben as comarcas?, Belun sape ta que sirben as deputazions porbinzials?,

Dende que se fizion as comarcas iste ye un tema de charradeta en cualisquier solana de qualisquier lugar d'aragon., Pero mesmo as instituzions no sapen pas. Ayere estié en a nueba paxina web d'a deputazion de Uesca:


y meten un planol d'a probinzia de UEsca trestallau en comarcas, pero como ya sapemos, as mugas d'as comarcas no son as mesmas d'as mugas d'as porbinzias....asinas que no beigo como se puet fer un planol de Uesca y sus comarcas..?¿?¿?¿

Ta yo, son as probinzias que no cal que sigan. me cuaca más l'ideya d'as comarcas. istos intes son mas a man d'as chens, y ripresentan millor a estructura reyal d'a de nuestros lugars y bals.

18.12.09

Lai deLenguas


Fa un camaton de diyas que no m'anaba por asti. O triballo, os quefers...

Pero dimpues de tantismas añadas, O parlamento aragones bien d'esbodregar a lai de lenguas. beluns diran que no ye prou, y bi'n a d'altros que diz que no caleba fer a lai.

Pero ancara mas iportan sera como s'aplica o testo:
--> Que feran os concellos? qui lis donara os diners ta desembolicar os dreitos que paiz qu'auran?
--> A DGA?, se metera de bien a cambear as cosas que ese teniu que cambear y que mai ha feto?
--> Y ta contrimuestrar que se charra l'aragones, u catalan?, caldra fer un esamen? qui fera l'esamen?

Creigo que dengun sape reyalmen como fer, pero caldra cusirar con muchismo cudiao que fan os politicaires.....


17.6.08



Esti zagero cabo semana estié en Anso, y como siempre que mos chuntamos os amigos, lifara, fartera, y tot l'ordio d'o mundo.

Tamien besitamos lo lugar, como siempre femos cuan i-bamos, ista begada guidatos por un amigo de casa rogante. Y ya de nueis y con bellas bieras charremos con altros chobens d'o lugar. Prenzipiemos poquet a poquet a cambear dende o castillan dica l'aragones, y pleguemos por charrar aragones de raso.

Aprobeite ta demanar-lis que pensaban de l'academia, si les feba goyo, si no lis importaba, si creyeban que podeba fer bella coseta por Anso..... y me rispondieron sin dengun dandalo que

"Mai un ansotano charrara cheso"

-quise esplicar que l'academia no ba a amostrar cheso a dengun, que solamen caleba tratar de no reblar, y achuntarse tots ta poder esfender-se y fer-se ascuitar. y que naide eba dito que caleba aprender cheso....

Me dizion que preferiban que l'ansotano moriese luego, a charrar bella cosa que no siga l'ansotano que ancara se charra en as 5 casas do se charra.

A charrada estie luenga, y tartimos de cosas que no han res que bier con a lengua....

.... pero a ideya de que os ansotanos no comparten a ideya de l'academia, u de que l'academia no sape ferse comprender, me ronda o tozuelo, y me plena de tristura.

L'esparbel Rondador

10.6.08

Yucatan, que esferen paiceba...


Como parez que ye la moda de güe, m'en soy ito de bacanzas ta mexico.

Yo no quereba fer como tozs os turistas que ban ta ra "riviera maya" a fartarse bien, y a zorrupiar tot o diya, u dica que sigan tan fuscos que no aduban. paicen un estallo güellas! de l'aeropuerto t'al hotel, bien fartos, un par de escursions por a redolada, y ta casa.

Si bien unas bacanzas d'ista mena puet estar mui dibertido con unos amigos, tamien ye berdat que puet estar mas barato a iste costau de l'atlantico, y no cal marchar t'o Yucatan.


Nusatros marchemos ta cancun, "rentamos un carro", y besitemos a peninsula fendo ro que mos bagaba.


De primeras mos prexinamos que si no a ro mesmo ran que Europa, a chen bibiba bien;

pero ya o primer diya, cuan pleguemos t'o primer lugar rural, mos apercibimos que luen d'os hoteles y as instalazions ta ros turistas, a bida ye esferen, as chens son pobres, pero cuan digo pobres, digo que no son luen de ra fambre. Dengun portaba calzero, as ropas yeran biellas y miaja escoscadas, as casan yeran tradizionals de cañapita y palma, pero no tan bien fetas como isas d'os museos. Y cuan te ben, con l'auto, as alapargatas y a pocha "plena de diners", no beyen un hombre, beyen un dolar con de garras. y faran o que calga ta que lis dones un par de pesos.


Pero isto no ye o mas triste, a tristura ye ancara mas ampla cuan un rater dimpues plegas ta un "rancho" u fazienda, y bies a o mainate d'a redolada pasiando con o suyo caballo, y con un BMW y un Mercedes en a puerta d'a casa.


Unos dietas mas tardi, charrando con un estudiante d'a unibersidat d'o Yucatan li demanabamos por istas chens( totas de raza maya) que biben d'ista mena en metad d'a selba. Y mos deziba que o primer problema ye que no charran "español"(sic), y o segundo ye que no sapen estar competitbos, y os suyos productos y artesania ye prou cara.


Iste segundo problema me dixo enluzernau!!, como podeba estar que de chens que no podeban mercarse unas alpargatas, estiesen masiau caros, y a suya artesania no se podiese bender.

Pero parez que os chinos fan os productos d'artesania maya en china, leban as telas a camatons dica mexico, y benden istos productos a ros turistas que ban ta la "riviera maya" decindo que son mayas autenticos, cuan reyalmen bienen de china. Asinas que ros berdaderos artistas no pueden bender porque son prou caros, y naide lis aduya a esfenderse frente a ros chinos.


NO creyaz que nuestro biache estie que negatiu, tamien besitemos a saber-lo de lugars muy polidos, mulatos, mayas en redoladas do bi-ha mas riqueza, selbas, playas.... pero si me baga ya bos contare en otro inte!


l'esparbel rondador

4.6.08

Cornish a lengua que i torna.


Fa unos dietas ascuite que a lengua que s'emplega en o costau suroeste de l'anglaterra, o cornico(Cornish) si bien ye a lengua que s'eba emplegau d'antis mas, os charradors de güe no son que nuebos charradors, de chens que se son inetrasaus en a mena de charrar de os suyos lolos y han quiesto aprender-la.


Parez que o zaguer charrador estie un pescador que morio en 1906, pero bi'n ha de chen que diz que o zager charrador morie en a segunda medat d'o sieclo XIX u antis!!. Sin dembargo, o zaguer charrador de "cornish" que no sapeba ni garra d'angles morie en 1676, mes de 200 añadas fa!!.


Cuan t'apercibes detot isto, no adubes a comprener como ye posible que dimpues de tantas añadas, istas chens haigan recuperau a suya lengua, y güe os ninons aprendan a charrar en a escuela, y bi haiga un refirme ofizial, anque bien petito.


Perez una falordieta ta ninos, en metad d'o moundo global, cuan a saber-lo de lenguas son menazatas, cuan os charradors aragoneses d'as bals son unos poquers, bi'n a una que torna cuan parixeba que eba esparesiu!


Boy a continar leyendo sobre iste caso, que ye prou interesan, y quizas b'ha muito que aprender, Si istos fillos de la gran bretaña l'han feito, seguro que nusatros podemos.


2.6.08

Espanglish u Spanglish

L'atro diya cuan tornaba ta casa, ascuitaba, como goso fer RNE1, y tartiba un profesor d'una unibersida americana Ilán Stavans. Tartiba d'as chens d'orichen mechicano que bi ha en USA, parez que unos 20 millons, y d'os chicanos(25 millons), ixos americanos/mechicanos que siempre bi-son estatos en a suya tierra, pero a muga esnabeso una milenta de kilometros u mas y os suyos lolos se troboren americanos d'un diya a l'altro.

O profesor deciba que entre istos 45 millones de presonas ye comun charrar l'espanglish, ixa lengua que no ye ni angles ni castellan, y que a soben no son que ras chens treballandoras, que tamien as chens d'as clases altas gosan charran tal cual asinas, y adibiba que a mayor parti d'istas chens sapen charrar angles y "español mechicano", pero ta ers, ya mas fazil espresarse d'ista mena spanglish.

Asinas que Ilán Stavans a trsladau "Don quichote de la mancha"; Y si querez leyer o prenzipio d'o libro en ista nueba bersion, bisitaz iste binclo:

http://www.cuadernoscervantes.com/art_40_quixote.html

L'esparbel

22.10.07

Suiza, en aqueras montañas....


O sistema que han os suizos en as suyas eleuzions ta lo consello d'estau, una d'as dos chambras d'o parlamen, me paize prou interesante, y un echemplo de listas apertas.
O lumero d'escaños se calcula en funzion d'a cantidat de chen que i bibe en cadgun d'os 26 cantons qu'en bi ha., o mas gran, que ye Zurich en tiene 34., y bi ha 6 cantoners mui petitos que no han que uno solo.
Pero isto no ye esferen a tantos lugars d'o planeta. Iso que ye rarizo, ye la mena de fer y botar as listas d'os partius.

Os partius presentan una lista de candidatos en cada canton. O lumero masimo de candidatos ye o lumero de escaños que bi ha en o canton.

L'eleutor puet fer lo que li bague, la solenca condizion que ha, ye que no puede botar a mas candidatos, que escaños bi ha en o suyo canton. Puede botar a toz os candidatos d'un mesmo partiu, y asinas l'orden de la lista no cambea, ya que tozs os candidatos recullen un boto, pero tamien puede botar a candidatos de partius esferens, fendo la mezcolanza que li cuaque.

Incluso pueden ficar dos botos ta l mesmo candidato.(menos en os cantons petitos que solo han 1 escaño).
Ta calcular de primeras se suman os botos ta los partius( ixos botos que son ta un solo partiu), y asinas fan a trilla d'os escaños de cada partiu. Dimpues os candidatos d'as listas se ordenan seguntes os botos totals que haigan obteniu, y asinas sapen qui ye a testa de cada lista, qui ye o segundo, o terzero....y se dan os escaños seguntes a trilla que eban feito aban.

Prou importan ye que os partius no pueden eslexir qui ye o suyo condidato preferiu, que os botans dizen a la fin qui quieren que siga o suyo ripresentan.

Beluns siñalan que bel candidato puede posizionarse cuentra(u refirmando) bel coleutibo ta haber tots os suyos botos y refirme y asinas estar prou condizionau a fer una politica aman d'iste coleutibo.

Se diz que de ista mena, o poder s'en ba dende os partius dica os grupos de interes, sigan como sigan. Pero creigo que a la fin ye o botante qui eslixe o qui le bague, y no tiene per que fer lo que s'en diz en o suyo sendicato, asoziacion y coleutibo...

Ya m'en dorez que bos paize, pero creigo que ye un sistema millos a ise de nombre rarizo qu'en habemos por istas tierras.

l'esparbel chelau ( que frio fa en suiza)

17.10.07

L'Autobia


Gue boi charrar de l'autobia, isa que fa tantismo tiempo dizen que plegara dende Chaca ta Pamplona, y que os nabarros fan poquet a poquet, pero que en aragon ni Pon!


Ya soi a saber-lo de trefucao, d'un costau me cuacaria poder benir ascape ta chaca, y que l'autobia ese feita,pero de l'altro costau, tiengo una medrana...


No sera una gran nafra en a Tierra?, no sera una cabañera ta los camions bascos y catalanes que no faran que nabesar dende Yesa ta Almacellas. Paicera una ringlera de formiguetas con camions de tota mena, plena de periclos, y que mos trayera un desembolique desordenau??????


Tan y mientres, 4 bagadas por semana paso por por as obras,( as nabarras, claro) y no se si aturarme ta aduyar y que rematen ascape, u posar una bomba y que aturen de ferla!!!


l'esparbel

31.7.07

Torno t'o rete


Ya fa mas de seis meses que no m'amano por o rete, a bida, un capuzete que die en o mon, dos operazions, y prou tiempo sin poder menar o brazo.

A blogsfera a continau o suyo camin, bi'n ha de nueba chen, bi'n ha d'altros que se son idos, pero siempre puyando.

Biengo de leyer en o blog "Estricalla" que fa unos dietas se fizio una trobada de bloggers en Zaragoza, que seguro estie sobrebuena. Si l'ese sabiu.... :-)

Bueno, dimpues de tantismos meses en o niedo, l'esparbel torna a bolar, y prometo que d'asti enta deban parare cuenta en o mon ta no ferme un sisate como iste que en o brazo.

esprisions,

l'esparbel Rondador

31.1.07

As nieus que plegan, as chens que i-plegan

Fa unos dietas que l'esparbel no escribiba, pero esbarizé en o chelo en a Bal de l'Aspe(Bearn) y m'esclé o codo, asinas que dende allora no hi feito que dondiar de un espital ta un altro, ferme operar(lebo meya arroba de ferralla en o codo), y sulsirme de bier o despacio que marcha tot.

As nieus son plegatas!, encara que no ye prou ta cubrir os mons, ye prou ta que as milentas de turistas puyen ta ras bals ta esquiar en a poca nieu que bi'n ha, y tormar a saber-lo de goyosos con a cara roya y a marca d'as lunetas(si no tornan nafraus).

Esti cabo semana estie en a mia Bal, y as chens que yeran en os hoteles, rstaurantes, por as carreras...no yeran zagals de Zaragoza u Pamplona minchandosen un bocadillo, sino ninons bien con as suyas camisas, os suyos autos de muitos millones y os suyos billetes berdes.Os osteleros son bien goyosos de podersen aprobeitar d'ista chen, y si bien l'añada estara mala, cal mirar de amillorarla como siga.
Pero yo me demano do son os zagals con a tortilla de patata que minchan en l'auto? no pueden pagar-se o fostait?, y os hoteles "baratos" ya no bi'n ha? Aramon que fa? Fer que tot siga mas costoso ta que no puyen os chobens aragoneses, pero si os ricos de madrid? u de zaragoza u Euskalherria que tamien bi'n ha.?

Cuan yo yera zagal esuiabamos totz con os mesmos esquis, lebabamos gambetos parellanos(royos, blancos y negros), y si que bi habeba ricos, pero no yera como güe.

l'esparbel

8.1.07

L'orache ye tornando fato


Iste cabo semana estie en a Bal. y a tristura estie gran cuan en plagando o bienes de nueis no biye cosa de nieu!, normalmen cuan t'amanas t'o lugar con a luna plena a nieu blanca fa que se beigan totas as montañas, y a luz baixa dica los lugarons, pardinas y bordas, Pero iste biernes o paisache yera fosco, os mons negros, parduzcos, solo as estrelas se biyeban estre as sombras d'as montañas.

M'alcuerdo de un nadal fa muitas añdas( 88-90 alto u baxo) que no bi eba de la nieu, y yo iba con a becicleta por os camins secos y bembas ancara berdas, Pero o zaguero diya de l'añada a nieu plegue y estie un buen ibierno de nieus. Pero ista añada ye diferen, Ya semos en meta de chinero y ni pon!, fa una caloraz que t'aplana, no pleba cosa, a nieu, que en as tucas y picarras bien altas!,

Ya fa muito tiempo que s'en charra d'o cambeo en o tempero, do calentamiento global, y as chens son de mas en mas consciens d'o problema. Pero yo, ista ye a primera bagada que beigo a mia bal sin de la nieu. As chens tristas......... medrana por os diners inbertius.............. os turistas espantaus!

Si ye berdad iso de "año de bienes año de bienes", semos asaber-lo de amolaus!,

L'esparbel triste.

4.1.07

ETB2

Ayere de nueis biye una charrada en a Tb basca ( ETB2) sobre "o Proceso"., bi eba o mainate de "A Sinrazon", o maintate de Berria, un profesor d'a unibersida basca, un altro de a uniberdida de La Rioja, un altro catalan, y no m'en remero qui yera o siseno. A charrada no estie guaire clara. Cadagun tartiba d'os suyos interez, y paiceba que no tartiban d'o mesmo tema. A trobada desemboliqué en luita, y terminon charrando de Irak. Y paiceba que "A sin razon yera o "gabinete de prensa de Bush", y Berria un portaparola de Alquaeda!

como dizeba ayere, en a carrera no s'en dice ni pon!, pero ayere en a tb as distanzias entre unos y altros se mostron a saberlo de grans.Prexino que caldra que pase un poquer de tiempo ta que se pueda tornar a charrar sin tirar de beta, pero güe, pue ser que no solo no s'en charre por indiferenzia u medrana como yo diceba ayere, pero tamien por no concararse con o bezin, o compañer u amigo.

L'esparbel

3.1.07

O silenzio

Ya fa bells dietas que que os Etarras metion o petardaz ixe en a T4 en Madrid, y tamien fa bells dietas que no se charra que d'iste inte en a TB, Radio y altros meyos de comunicazion, pero asti do yo paro( en Euskadi), naide en charra, ancara ye tabu. Ni con os compañers d'o treballo, ni con os amicos. Tiengo a impresion de que estie una inozentada, y que mai ese pasau. y me demano si istos ocmpañers mios d'o triballo tienen as suyas opinions pero no quieren espresarlas, u si reyalmen estan fartos de tanto charramplis, y fatezas d'os unos y os altros; y continan con a suya bida como si res ese pasau, bueno, si que ye pasau, pero o mesmo de siempre.

Indiferens, u acotolaus, amedrantaus.......

Yo no beigo güellos de medrana, pero si de indiferenzia......

L'esparbel

Ent'alto a mia Tierra, Que ista añada que biene de i-plegar siga l'añada de l'aragonés!

21.12.06

Buen Nadal!

Como diz Choben en o suyo blog(estricalla), a blogosfera a aragonesa s'amorta amonico, y son pocos os que ancara dixas bellas parolas anque no mas siga un diya par d'altro.

Beluns prebamos de fer-lo cuan podemos, pero a bida, o treballo, Internet( yo no disposo d'o rete que n'o treballo) fa que no siga tan asoben como mos cuacaria.

Beyeremos si l'añada benien, prencipiamos con rasmia, y si no tozs os diyas si 2 u 3 post por semana.

Nadal s'amana a'scape, y l'esparbel tornara ta l'alto Aragon, que fa ya masiaus diyas que no m'amano ta la bal.

Ya bos dire que he trobau baxo a tranca Nadal!

L'esparbel Rondador

14.12.06

PINOCHET


Ola a toz,

Ya fa unos dietas que no m'amanaba por asti, y creigo que no m'amanare guaire dica l'añada benien. Pero no podeba pasar la muerte de PINOCHET. Cuan beye en a TB que li faceban un entierro commo mainate mairal de l'echercito no podeba creyer-lo, Y cuan ascuite como os militaires chuflaban a ra ministre d'esfensa como si ella yera a "mala"....

Y paiceme dificil de comprender cuan Chile ba a estar considerau un pais desembolicato dende chinero de 2007, cuan o gobierno ye democratico.etc....

Asinas que prexino quea conbibencia chilena no estara garra facil. Bi abra de chens que sigan en cuentra d'o rechimen militar y bi'n abra d'altras que remeren a dictadura como un tiempo millor que o presen; isto no ye nuebo, pero la muerte de Pinochet mos a mostrau una dibision terrible, yo mai ese dito que fuese si gran. Y si bien o pais paice que marcha enta deban, me foi de dandalos, y creigo que ye prou interesan.

y foi una pregonta, sin pinochet, as chens que no yeran cuentra a dictadura...ban a disparecer?, ban rechirar una nueba figura?, continaran esfendiendo as politicas de Pinochet?tienen bel esdebenidero ? ......beyermos

L'esparbel

16.11.06

RUESTA


Iste cabo semana estie en Ruesta, ixe lucaron xublidau d'a canal de Berdún. Yo no bi eba estau mai, y a impresion que tenie estie grandiza.
Cuan t'amanas ta lo lugar nabesas una selba de pins que no te dixa bier o paisache, asinas que cuan bies o lugar por primera bagada ya yes prou amán, y a sorpresa ye gran. As murallas, a torre d'o biello castiello, as casas... altizas sobre un puyal, os tellaus que ya no i son, la tristura de lo abandono....

Y peren, bindose dende o Castiello o dende cualisquier casa....l'entibo de Yesa...

O lugar no ye petito, tiene dos carreras luengas que nabesan a poblazion dende a entrada dica o castiello, bi'n ha de casas grans, que charran d'un pasau importan, d'altras petitas, puertas polidas, casas que encara no reblan a ros oraches y ras añadas.., b'n ha d'altras que ya fa muito tiempo que dixaron d'aguardar que tornasen os dueños....

d'o son as chens que fa no muitas añadas plenaban isas bals?

O mio esmo esdebino tristura, y a tristura... rabia, bergoña, impotenzia........

ENTIBOS NO PAS.

l'esparbel

7.11.06

L'esdebenidero....

Nairobi, 6-17 Nobiembre 2006,
Cuasi totz os pais d'iste planeta nustro se son trobaus en Nairobi ta charrar de l'esdebenidero luego de Kioto, y de primeras no se si escampara a la fin d'a trobada, u ancara bi habra de boirons bien recios ta lo meyo ambien.

O dandalo que tiengo, ye si o "quiesto" amigo Bush ba arrimar o güembro y refirmar o texto final, u ba fer como peren ha feito, refirmar os mainates d'o suyo pais que no miran que ta lo suyo melico y ta ros diners que fan a suyas interpresas con as suyas fumeras y altros repuis.(30% d'a ponzoña mundial)

Paiz que "España" refirmara o testo (ta yo no tiene garra merito, ya que como miembro d'a UE no puede eslexir). y lo que cal ye que se'en faiga mas, que creigo que no mos escañaremos, bi'n ha d'altros paises que fa añadas que a suya economia crexe sin prezisar que os repuis y fumeras lo en faigan.

Seguntes os espertos, estará alazetal que os paises grans que son en bias de desembolique refirmen o testo (China, India, Brasil, Surafrica.....) chunto con EEUU ta que l'efeuto d'os compromisos sigan os deseyaus!

Cal dizir que bi'n ha un representan aragones, pero no se qui ye, beluno sape qui ye?? y que fera en Nairobi?

Cuan remate a trobada ya en charraremos mas, y podremos bier si ha escampau una miajeta u ancara son plegaus mas boirons recios y foscos....

Esparbel Rondador

2.11.06

Monflorite se fa gran!!


Quiestos amigos, ya fa bells meses que lo aeroporto de Uesca se fa gran. O biello aerodromo de Monflorite ise chicorron en o saso entre Monflorite y alcala, ya tiene asfalto, una pista prou gran do pueden aterrizar os abions de pasacheros, y ancara mes importan, una "Terminal" ta recullir a os pasahceros que paiz que plegueran ta monflorite.

Cal dizir que muita chen no creyeba n'o proyeuto,que diziba que no caleba gastar os diners ta fer-lo yq que zaragoza no ye que a 70Km.

Pero o diya de güe tenemos una notizia mairal: Ya tenemos abions, interpresa, y una data: primeros de Frberero.

Paiz que se ba creyar una interpresa que se clama Pirenair, que disposara de no se cuantos abions a reauzion de 50 plazas(como buses) y que tendra tamién helicoteros ta ir dende Uesca ta las Bals dó pirieneo en menos de 15 min.

Charran de destinos de l'estau como MAdrid, Valencia, Malaga..... y rechiran tamien bells buelos t'altros lugars europeos, pero ancara no han dito res.

Y Paiz tamien que han demandau a Ryanir ta que pose belun buelo en Uesca....

Yo ancara soi una miajeta eszeutico, y caldra bier como se desembolica, pero si sale bien, sera prou importan ta Uesca y Aragon..

L'esparbel luego no sera o solenco mainate d'os aires aragoneses, que bi'n habra de Fierro y con rodetas. :-)

L'esparbel rondador

18.10.06

Koala...que bergoña!


O diya d'o pilar m'en baixé ta zaragoza, y cal dizir que ya feba un camaton d'añadas que no bi-eba baixau.

Yo ya prencipio a estar una miajeta mardano, asinas que m'en fui ta interpeñas a bier a ros "celtas cortos", a remerar isos tiempos cuan yera choben..:-)

O conzierto de Celtas cortos no estié mal. Ellos un poquer mas biellos, ye normal, pero yeran as cantas de siempre, unas poquetas nuebas, y a marcha que han teniu y que en tendran ta cutio. Pero dimpues plego ta zaragoza o pior artista que mai eba bisto yo.

Si yera "El Koala". Ya de primeras no comprendo pas como fan que canten o mesmo diya os celtas y "El Koala". Fizio un conzierto con 5 cantas!!, repitio una u dos, fizio o matutan mas de micha hora querindo chugar con o publico, pero as chens ya yeran fartas de tanta fateza y prenzipiaron a chiflarle, y finalmen s'en fue.
Pero isto no estie tot.
S'en eba iu sin cantar a canta isa d'os corrals, asinas que anque naide eba demandau un bis. O malfarchau ise ancara torno ta dizir que se l'eba xublidau cantar una canta y que no podeba dixar a Zaragoza sin ascuitarla, estio charrando 5 minuters(que tortura) y finalmente canto a canta isa d'os fozins y os corrals.

Como ya he dito yo ya soi mardano y soi iu ta bells conziertos y mai eba bisto cosa parellana. UNA BERGOÑA, no se si tornare mes ta zaragoza.....:-)

esprisions,

L'esparbel

11.10.06

Falorias Curtas.....(y yeran de Uesca!)

Una Falordia curta d'a colla anarchista que no reblo mai baxo a dictadura de Franco.
A colla "Pallarés" estie una d'as primeras collas que luito cuentra ra dictadura de Franco. Prenzipie as suyas auzions en terminando a guerra zebil. O nombre d'a colla ye o nombre d'o mainate, Joaquin Pallarès Tomás.

A suya "baralla" prenzipie en 1939 arredol de l'Hospitalet, Santa Eulalia, Sans y La Torrasa.
Estre as suyas auzions cal tartir de cuan dixeron muerto a o mairal d'a polizia de l'Hostipalet n'o 30 d'abril de 1939, u de cuan dixaron sin de armas u muertos a un camatón de polizias y autoridaz.

Pero bi'n ha un dato que m'a dixau enluzernau d'ixa falordieta. Entre os componens d'a colla, amás de Catalans, bi eban muitos aragoneses inmigrans que beneban d'a redolada d'a plana de Uesca.

Estieron capturaus en MArzal d'o 43, y luego de estar torturaus, estion achustiziaus o 29 de Marzal de 1943 Joaquin Pallarés y chunto a Fransisco Alvarez, Fernando Ruiz, Francisco Atarés, José Serra, Benito Santi, Juan Aquilla, Argüelles and Tresols.
Altros intergrans d'a colla como Vincente Iglesias, Jose Urrea, Manuel Gracia, Rafael Olalde u Hilaria Foldevilla fuyon y salbaron o garganchon.

26.9.06

Ez dakit.....(no se)


Ya fa cuasi 3 añadas que plegué ta tierra basca (euskalherria dizen por asti), y poquet a poquet pues aprendes parolas, bellas frasecicas, a contar dica 10.. y eso que bi'n a garra presona que me menaza ta que aprenda, pero cada diya aprendo una fateza.

Pero güe ha estau diferente, he clamau t'al serbicio basco de emplego, ta demanar informacion sobre un treballo prou interesante, y han refusau darme informazion en castellano, m'an dito que no yera posible temporalmente., y tiengo que reconoxer que m'he puesto furo.

Soy o primero que creigo en o refirme d'a lengua en tozs os rans, en o emplego diario, en que siga un meyo d'esprision normal....pero tan y mientres haiga una gran parti de la poblazion que ancara no charre l'euskara, cal donar tots os serbizios en as dos lenguas(ofizialmente si que lo fan, anque a reyalida siga distinta). Y si no lo fas, metes a ras chens furas(como yo iste maitin), y fas que a dreita española tienga mas argumentos, y que chens como yo tiengan bel dandalo. Y no aduyas, mas bien ficas una traba ta l'esdebenidero.

Espero que no suzeda asoben, y que siempre sigan prestos os decumentos en as dos lenguas.... Y en o esdebenidero, cuan tota a Poblazion siga "euskalduna"( como dizen por asti), ya beigan como fan.

Nusatros, los aragoneses, no tenemos que estar ecstremistas, si empentamos mmuito y esdebenimos ecstremistas, no faremos amigos, cal no reblar mai, pero paremos cuenta no faigamos masiada fuerza......e ista fuerza se torne contra nusatros.

22.9.06

Nazis....



Fa unos diyas que no escribo cosa. He estau triballando en ALemania, y no plegue ta casa que ayere de nueis.

Istos dietas No se charra en Alemania que de una cosa. Un partiu, el NPD(www.npd.de) biene de entrar en o Parlamento rechional de Mecklenburg-Vorpommern en as eleucions que se celebron iste domingo pasau. NPD ye o partiu NAZI de alemania. Dica no fa muitas añadas no podeban presentarse en as eleuccions,(no les ne dixaban).
Pero agora bienen de entrar en o parlamento de una rechion d'o que dinantes de clamaba DDR(Republica Democratica Alemana-RDA).
Istos esbarrenaus dizen que o Quiesto amigo Adolfo Hitler yera un Santo, y que o ecsterminio no estie berda. que ye un prexinallo d'os chudios y os americanos.

Cal dizir que o refirme no lo troban que en as zonas mas deprimidas, do a chen no ha de triballo y do as chens dirian "Si" sin de dandalos si retornara un sistema comunista.

Os partius grandes dizen que si totas as chens botaran y l'astenzion no estiese tan gran como ye o porcentahe de botos del NPD no plegueria ta lo 5%, minimo que cal tener en Alemania ta entrar en un parlamento.

L'Esparbel contina rondando.....

18.9.06

Sin Sentiu



O biernes de nuei binie dende Londres do bi he estau bells diyas. Y a "segurida" que diz que han en os aeroportos ye a saber-lo de redicula.

Por una parti estan as restricions en as cosetas que puedes puyar con tu ta l'abion, que no son as normals que bi'n ha en otros puestos:

--> No se puede puyar con dengun liquido, pero iso quiere dizir cualiquier mena de liquido, ni augua t'al biache. Y si ye menister porque tiens una maladia u ye comida ta un bebe, cal que le gustes deban d'os polizias ta que biegan que no yes terrorista; amas de portar bel decumento de un doctor anglés que diga que tiens a maladia.

--> No se puede puyar que un bulto, quie dizir que si una muller porta un bolser, ya no puede puyar cosa mas!!, y cal que siga tan petito, que anque biaches que por un solo diya con un bolser pequeñer, no se puede puyar con el.

Por otra parti son os polizias angleses con unos pistolons como dallas, con ropas antibalas, que en trobas a camatons por tozs os cados d'o puesto.

Pero o pior esta o trato que recullen os biachers, Cal a pasar o ocntrol sin de calzero, solenco y a polizia cachea un por un, toz los biachers, no dizen sisquiera porfabor u grazias, ye como cuan ficas as güellas en o redil.

Y se meten ancara mas furos con os que paizen arabes, u los que leban greñas.... si yo queriese meter una bomba suposo que no lebaria greñas ni paizeria arabe, no?....YE REDICULO

Pero cuan ya yes dintro, puez comprar lo que te cuaque, incloso bella cosa ta beber y minchar, pero iso si, bien caro que ye. Y en lo abion tamien puedes gustar lo que te cuaque, pero tamien si te dixas os diners..... Asinas que ye un negozio....

Y tamién ye prou interesante ta las intempresas tradizionales d'abiazion, ya que no estaban que las "low cost" que dixaban puyar tot que querebas ta l'abion, y agora con istos controls rediculos, as interpresas "low cost" pierden ista abantacha que teneban frente as tradizionals.

Y o mas Rediculo ye que iste trato no se fa que en Inglaterra, porque si biachas dende cualisquier puesto ta inglaterra tot ye normal. Solamen si sales dende o pais d'os fillos de la gran bret.... te fan a tana.

Güe boi ta Frankfurt, y abos contare como son as cosas por iste puesto.....

Esparbel Rondador.

12.9.06

1 Chinero 2007


L'añada benien l'irlandes, u gaelico estara nueba lengua ofizial d'a union europeya. Ya fa muitas añadas cuan estie unos meses en Irlanda, e ixe parlache rarizo, que paizeba una canta, que trobaba escrito en cualisquier esquina, pero que rara bez ascuitaba, clamó la mia atenzion. Dende allora siempre me ha cuacao saper que pasaba con ista lengua, y agora son de enoragüena porque a la fin la EU reconoxe a lengua como ofizial de primer ran.

Sin dembargo, no tot son buenas notizias. y l'esdebenidero ye pleno de boirons. En o mapa que biengo de i-ficar podez bier as zonas do la lengua se parla tots os diyas como lengua de triballo, comerzio, ... ye o que os irlandeses claman "Gaeltacht" y han un status espezial. Pero son espazios rurals, y no i biben que 80.000 presonas alto u baxo en istos territorios.
Anque as zifras ofizials digan que son 1.6(25% d'a poblazion) millones os que sapen charrar a lengua, Naide charra d'o ran de conoxedura, y casi no bi'n ha de chen que charre de contino!

O lumero de fablans no ha feito que baixar dende o 1916 que Irlanda se fizié independien, y a lengua esdebino ofizial en tot o pais. Creigo que ye platero que no ye sufiziente con a ofizialidad, anque prou importan, sino que cal triballar de bien y con rasmia ta esfender una lengua.

esparbel rondador

8.9.06

Tornar t'o niedo


Güe ye biernes, e iste cabo semana boi ta casa d'os mios pais, l'esparbel torna t´o niedo.
Pero como cada begada que i boi, caldra que pase or as curbas de Yesa.....
Y me tornare fato de tanto chirar y chirar.
cada bagada que nabeso l'entibo me meto triste, muito triste, y cuando se beyen os muros de l'hotel de Tiermas que amanixen de baxo as aiguas, ancara me meto mas triste, pero d'isto ya en charrare un altro diya.
Lo que me mete furo ye la carretera/comunicazions que bi'n ha entre Nabarra y Aragón. Y que a carretera que bi'n eba cuan yo yera chicorron y iba ta Pamplona, ye a mesma do sieclo XXI, que emplegare ista tardi cuan baiga ta "casa".
Cuan no i trobas zientos de turistas que bienen y ban.( contra mas añadas pasan, ye mas difizil ),
bi trobas de chabalins, paniquesas, rabosetas.....tota una mena d'animals que quieren nabesar a carretera y plegan esclafaus contra lo morro de bel auto.
Dende que iba a Pamplona de chicorron toz tarten de ixa nueba bia ( autobia u carretera amillorata, u cualisquier cosa millor d'a carretera qu'en tenemos) , pero ancara no s'ha feito cosa. Y tiengo a saberlo de dandalos, de si se fara ascape como beluns dizen(politicos), u si ixos debanproyeutos, estudios y promesas ban rematar antes de que o esparbel faiga un niedo en Aragon.
Os Nabarros bienen d'aturar as suyas obras que ya eban prenzipiau porque dizen que no quieren rematar as obras antes de que Aragon sisquiera prenzipie as suyas.
Y En a Parti Aragonesa.....qui sape?..........
Güe bos dixo sin mas tartir, y cuan torne a semana prosima, bos contare mas cosetas d'o camin de cabretas que boi fer d'asti enta Chaca en que nimbie iste Post.

esprisions y buen cabo semana

Esparbel Rondador

7.9.06

Casa de España....


Fa bels añadas, cuan plegué ta Alemania, yo solo quereba aprender a lengua, asinas que no faceba que triballar, estudiar aleman en a Escuela d'adultos, y charrar con os poquets alemans que m'achuntaban.

Luego de 4 u 5 meses sin bier a os mios pais, y a os mios quiestos amigos, m'en dicié que caleba trobar chen d'a tierra, rechire en o lugar, y trobe una "Casa de España".

Ista Casa de España yera chicorrona, y paiceba que s'eba quedau en as añadas 60, cuan as chens que i yeran, plegueron ta Alemania. No i habeba que hombres, chubilaus tots, chugando al Mus, fartos de bin, y s'ascuitaba "Mecagüendios!" "Joé!, que no tiene ni puta idea!!!""Por los clavos de cristo!!".....

O puesto paiceba un bar de un lugaron chicorron d'istos que puez trobar cuan bas a lugars de no mas de 10 casas, miaja escoscau, un par de Jamones colgaban en una esquineta, y yera pleno de foticos a saberlo de biellas de Extremadura, Andalucia, Castiella..., demané porque no bi habeba denguna de Aragón, y me dizion que si, que bi habeba una de Torla, en blanco y negro.

No m'en remero d'os nombres d'as chens que bi trobé, pero no se creyeban que un choben estiese en o puesto, y cuan lis dizié que faceba bels meses que i yera, me dizion que tornara ascape, que sino no tornaria mai!, y prou importan, que no me casara con una alemana..:-), que beluns ya lo habeban feito.... y no paiceban contentos. (en isto zaguero, pense que si en teneban de razon).

Cuan pregonte si belun yera aragonés, me dizión que ya no en quedaba denguno; que tots yeran tornatos ya ta Aragon, que solo quedaba belun fillo d'aragonés ya meyoaleman (u aleman entero).

Como no bi habeba aragoneses en o puesto, y no podeba chugar al quiesto Guiñote, no torne que una o dos begadas. pero me fa goyo pensar que isos aragoneses que tenion que marchar triballar ta alemania ancara sentiban a tierra y yeran tornatos ta casa luego de muitas añadas, y no habeban dixau de zaga que una fotico de Torla.

6.9.06

Sapebaz que.....



Güe boi contar una coseta curiosa, Sapebaz que fa bels añadas... no m'en remero bien (1999-2000 alto u baxo), Una imachen parellana a ixta estié a imachen de "España" en Alemanaia?

Estie una campafa que fizió "la oficina de turismo española en Alemania", y se podeban trobar foticos de Riglos en cualisquier lugar de Alemania.(quizas bi estié un oscense triballando
en a campaña....)

Ye facil prexinar que naide sapeba do yera ise mon rarizo, una miajeta royo, y cuan les dizeba que yera aragones, y que yo eba naxiu en isa redolada, habeba muitos que mai habeban ascuitau la parola "Aragon".

Asinas que cal fer mas astrapaluzio ta que se mos ascuite y se charre de nusatros. Y desincusas como que semos prou choicots no me cuacan miaja!

Yo ya fa muitas añadas que baiga do baiga dixo platero bi ha mas que "Katalonien, Baskenland, Malorka y Teneriffa".

Esparbel Rondador

5.9.06

Rondador de Perén........y ta cutio!

Hola a toz!

Ye la primera bagada que escribo en Internet, y antimás m'a parexiu que cal que lo faiga en a ista lengua tan polida que beluns quieren amortars y belatros no quieren esfender, yo ya fa un camaton d'añadas que m'en soy ito d'a tierra aragonesa, y solamen d'ista mena, escribindo, puedo refirmar a ixos poquers que ancara la i-charran.

Ya no torno que de tan en cuan ta aragon, y ancara menos ta la mia bal, pero fa-me a saberlo de goyo leyer cualisquier coseta n'aragones, asinas que creigo que ye chusto que yo tamien en escriba beluna.

Me cuacaria muito poder tornar ta la mia tierra, y cuan siga posible ya lo en fare. Pero tan y mientres prebare que iste blog siga un contauto con a tierra de os mios pais y os mios lolos, y como diz a "Ronda de Boltaña": "El pais de mis hijos serás".

Esprisions,
Esparbel Rondador