Esparbel Rondador

Blog d'un esparbel que fa unas añadas s'en fue t'al norte, an pleba de la nieu de peren y no conoxioron mai l'imperio romano, dimpues s'en fue t'al sur, an os alpes y ro mediterraneo se i troban, prou luego estie en a isla d'a libra y o burger King, ascape torne a cambear de nido, y pare por as tierras d'a txalaparta lo txistu y o fromache d'idiazabal. pero o suyo prexinallo ha estau de peren en as bals aragonesas y como fer ta tornar-ie.

7.9.06

Casa de España....


Fa bels añadas, cuan plegué ta Alemania, yo solo quereba aprender a lengua, asinas que no faceba que triballar, estudiar aleman en a Escuela d'adultos, y charrar con os poquets alemans que m'achuntaban.

Luego de 4 u 5 meses sin bier a os mios pais, y a os mios quiestos amigos, m'en dicié que caleba trobar chen d'a tierra, rechire en o lugar, y trobe una "Casa de España".

Ista Casa de España yera chicorrona, y paiceba que s'eba quedau en as añadas 60, cuan as chens que i yeran, plegueron ta Alemania. No i habeba que hombres, chubilaus tots, chugando al Mus, fartos de bin, y s'ascuitaba "Mecagüendios!" "Joé!, que no tiene ni puta idea!!!""Por los clavos de cristo!!".....

O puesto paiceba un bar de un lugaron chicorron d'istos que puez trobar cuan bas a lugars de no mas de 10 casas, miaja escoscau, un par de Jamones colgaban en una esquineta, y yera pleno de foticos a saberlo de biellas de Extremadura, Andalucia, Castiella..., demané porque no bi habeba denguna de Aragón, y me dizion que si, que bi habeba una de Torla, en blanco y negro.

No m'en remero d'os nombres d'as chens que bi trobé, pero no se creyeban que un choben estiese en o puesto, y cuan lis dizié que faceba bels meses que i yera, me dizion que tornara ascape, que sino no tornaria mai!, y prou importan, que no me casara con una alemana..:-), que beluns ya lo habeban feito.... y no paiceban contentos. (en isto zaguero, pense que si en teneban de razon).

Cuan pregonte si belun yera aragonés, me dizión que ya no en quedaba denguno; que tots yeran tornatos ya ta Aragon, que solo quedaba belun fillo d'aragonés ya meyoaleman (u aleman entero).

Como no bi habeba aragoneses en o puesto, y no podeba chugar al quiesto Guiñote, no torne que una o dos begadas. pero me fa goyo pensar que isos aragoneses que tenion que marchar triballar ta alemania ancara sentiban a tierra y yeran tornatos ta casa luego de muitas añadas, y no habeban dixau de zaga que una fotico de Torla.

2 Comments:

At 5:18 p. m., Blogger Choben said...

Bueno, sentiban aimor por a suya tierra y en tornón, pero podeban haber dixau bella cosa d'aragón y haber feito presén aragón... y no nomás con un retrato de torla... xD

Remero cuan yera en manchester que marchemos t'o edifizio d'o conzello y beyé una placa d'a republica española, prou curiosa, con bella cosa feita por a Pasionaria, y con os nombres de güeito barallas d'a guerra. Y tres de ellas aragonesas!! belchite, teruel y ebro (a beyer si bel diya i puyo lo retrato ta amostrar-tos-lo). Demandé por ixa placa, pero garra presona de manchester la conoxeba. Me fizo goyo de trobar bella cosa d'a mía tierra por astí, antimás cuan cuasi garra presona sabeba d'a suya ecsistenzia.

 
At 5:46 p. m., Anonymous Anónimo said...

Te goyo te tenie que fer!

Fa 6 u 8 añadas estie de bacanzas en Budapest, y bi trobe un monumento por os soldaus Hungaros muertos cuan luitaban por a Republica española, y bi poneba os nombres de cadaguna d'as barallas do moriereon. Si Boi bel diya ta casa d'os mios pais, escaneo o Retrato y foi un Post.

 

Publicar un comentario

<< Home